عشان مانعلا ونعلا - لحن المنافقين
عشان مانعلا ونعلا ونعلا لازم نطاطي نطاطي نطاطي
عشان مانعلا ونعلا ونعلا لازم نطاطي نطاطي نطاطي
بسلامته الوالي أبوزعيزع مهجص باشا دقن تعيتع
أفيونته تمللي قال إيه نترصص دايما حواليه
نروح واقفين زنهار زي القط والفار
نلقاه دايما منفوخ نفشر له طاخ طيخ طوخ
الرك على حبة بولوتيكه وذمة كاوتشوك خربانه
مادام الأمير ملته أنتيكه لازم الرعية تكون وحلانة
الرك على حبة بولوتيكه وذمة كاوتشوك خربانه
مادام الأمير ملته أنتيكه لازم الرعية تكون وحلانة
حزر فزر ياواد أنت بعقلك بعد الحنشصة دي اللي أنت عليها
ياهلترى الدنيا دي حاتروق لك وتشوف ماشاف قراقوش فيها
تعرفش المسأله إيه عرنوس متعفرت ليه؟
من حقه سلامات سلامات ايش حال القفوات
الجميع: محاسيبك
حسن: ياخي سيبك
أول شرط نطاطي البصله لسيدنا الوالي ونستعبط له
مهما تسمعوا تهجيص اعملوا روحكم بلاليص
مهما نسمع تهجيص نعمل روحنا بلاليص
بلاليص بلاليص بلاليص بلاليص بلاليص بلاليص
عشان مانعلا ونعلا ونعلا لازم نطاطي نطاطي نطاطي
==========================================================
هو بعينه وبمناخيره هو بوشه وبشفاتيره
هو بعينه وبمناخيره هو بوشه وبشفاتيره
هو اللي أنا بالي فيه م الأول
مالحقتش أبص في وجناته وسمنت النص بغمزاته
سيف: صواميل رجليا سايبه مني
نزهة: وأنا عصافير قلبي بتغني
سيف: سبحانه ما احلى تعديله مافيش كده لما يعدلها
الجميع: اتلم سيف الدين ع اللي له واتلمت نزهة ع اللي لها
سيف: والله زمان يامهلبية
نزهة: من قلبي لقلبك دوريه
سيف: وحشتني عيونها العسلية
نزهة: وحشتني رموشه البصلية
الجميع: أهو دا المجور وادي الشاليه قرموط اتجوز بلطيه
أهو دا المجور وادي الشاليه قرموط اتجوز بلطيه
الليله الحنه ياعينيا
وبكرة تكون الصباحية
===========================================================
طقطوقة يامرحبا بك
يامرحبابك يامرحبابك آدي اللي نابنا وأدي اللي نابك
ست الدار: ماضاقت إلا وفرجها سيدك يارب نجينا م المهالك
يامرحبابك يامرحبابك آدي اللي نابنا وأدي اللي نابك
ايشبار علينا ياما خدعنا لولا حزنبل لكنا ضعنا
ايدنا في إيدك طبل وزمر
لازم نكيدك ياحمص أخضر
دي العبودية ماخلص زمانها
وادي لحرية حايئون أوانها
==========================================================
نشيد أنا المصري كريم العنصرين
أنا المصــرى كريـــم العنصـرين بنيــت المجـــد بيــن الإهراميـــــــن
جدودى أنشــأوا العلـــم العجيــب ومجرى النيل فى الـوادى الخصيب
لهــم فى الدنيـــا آلاف الســــــنين ويفــنى الكـــــون وهم موجــــودين
واقــولك ع اللى خلانى أفوت أهلى وأوطانى
حبيب أوهبت له روحى لغيره لا أميل تـــانى
==============================================================
نشيد أحسن جيوش في الأمم جيوشنا
أحسن جيوش في الأمم جيوشنا وقت الشدايد تعال شوفنا
ساعة مانلمح جيش الأعادي نهجم ولا أي شئ يحوشنا
مستقبل الأمة بين إيديكم في الوقت ده نعتمد عليكم
ردوا آدي الشعب بيناديكم بيقول لكم احفظوا شرفنا
أحسن جيوش في الأمم جيوشنا وقت الشدايد تعال شوفنا
ساعة مانلمح جيش الأعادي نهجم ولا أي شئ يحوشنا
آدي جنودنا وآدي بنودنا وفي الدفاع والهجوم تجدنا
مالناش صناعة غير الشجاعة وللجهاد ربنا خلقنا
أحسن جيوش في الأمم جيوشنا وقت الشدايد تعال شوفنا
ساعة مانلمح جيش الأعادي نهجم ولا أي شئ يحوشنا
نشيد دقت طبول الحرب ياخيالة - لحن الحرب
دقت طبول الحرب ياخيالة وآدي الساعة دي ساعة الرجالة
انظروا لأهلكم نظرة وداع مرة مافيش بعدها إلا الدفاع
دقت طبول الحرب ياخيالة وآدي الساعة دي ساعة الرجالة
=========================================================
البوسته جايه
- لحن ساعي البريد
البوسته جايه البوسته جايه أيوه هيه أيوه هيه
حلمكم ياولاد عليه دا انتم زغللتم عينيه
أنا قبلكم شوف لي اسمي
من عينيه آدي اسمك .. وانتي ياختي
بنت: شوف لي عندك اسم خضره
الساعي: وآدي اسمك أنتي رخره
اقروا يالا وبشرونا وأنا راجع للخاتونه
أخرى: نقرا قبلا الأولاني
أخرى: ياختي سيبي
لما أشوف قبله اللي جاني من حبيبي
وأنتي ليه يعني جوابك له علامة
الحبيب منصور وراجع بالسلامة
بنت: ياحلوللي انشالله ياختي
بنات: يبقى من بختك وبختي
امتى هيجونا وطمن عليهم
واحنا ننزل بوس وعض وحضن فيهم
دول عساكرنا اللي جاهدوا وشرفونا
حظهم وأنسهم واجب علينا
======================================================
لحن الصنايعية
- الحلــــوة دى
لحن سيد درويش كلمات بديع خيرى
الحلــــوة دى قامت تعجـــن فى البدريـــــة والديك بيــدن كوكو كوكو فى الفجــــــرية
يالله بنــــــــا على بــــاب الله يا صـــنايعية يجعل صباحك صباح الخير ياسطى عطية
طلــــع النهــــار فتــــاح يا عليــــم والجيــــب مافيهــــشى ولا مليــــــم
مين فى اليومين دول شاف تلطيــم زى الصـــــــنايعية المظاليـــــــــــم
الصبر أمره طـــــــال وايش بعد وقف الحال
ياللى معاك المـــــــال برضه الفقيــر له رب كريم
أولاد أوربــــا ما بيناموش عن الصـــــــنايع ما يونوش
لافرنجى دايما حلق حوش والمصرى جنبه بيطلع بوش
ســبع صـنايع فى إيدينــــا والهـــــم جايــــــر عليــــــنا
يامـــا شــــكينا وبكــــــينا يا أغنيـــــا ليه ما تساعدوش
ما تشد حيلك يا بو صلاح إضربها صرمة تعيش مرتاح
خلى تكـــــالك ع الفتـــاح يالله بنا يالله الوقــت اهو راح
الشمس طلعــت والمــــــلك لله
ما تشيل قدومك والعـــدة ويالله
اجــرى لرزقك خليها على الله
====================================================
والله تستاهل يا قلبى مقام عجم
لحن سيد درويش كلمات أمين صدقى
والله تســــــتاهل يا قلبى ليه تميــــــــل ما كنت خالى
انت أســــباب كل كربى وانت أســـــــباب ما جرالى
إيه بقى اللى ح يواسينى بعد ما انهــــــــدت آمــــالى
اذا كان حظى ناســــينى مين اروح له اشكى له حالى ان شكيت قلبى وحواسى يعمــــلوا مؤامــــــــرة علىّ
وان بكيـت والحب قاسى تشــــــتكى منـــــــــى عينىّ
أعمل ايه واحنا ف غربة والأغـراب دول زى اليتامى
يا مين يواسيهم فى كربه يامــــا بيقاســـــــــوا ويامــا
يارب كل من له حبيــب طــــــال بعــــاده وللا قريب
ما تحـــــــــــرموش منه وهــــــــاته له بالســـــــلامة
===========================================================
ده بأف مين
كلمات بديع خيري و تلحين سيد درويش
ده بأف مين اللي يألس
على بنت مصر بأنهي وش
و النبي يجري يتليس
ماطلع كلامه طظ! فش!
النوه النووه
هي هي هيه
شغل البكش ده يا أختي
مابقاش ينفعنا دلوقتي
دي المصرية كتّر خيرها
في التربية سبقت غيرها
يا سيدي إنت
البنت تفضل محبوسة
قال جوه بيتها يكون أظبط
لحد ما تبقى عروسة
بدال ما تفضل تتنطط
العفو العفو
يا سلام
يا سلام يا إخوانا دي العبرة
ماهيش في جوة و لا برّة
عمر الحرة ما تبقى عرّة
عمر العرّة ما تبقى حرة
يا سيدي إنت
باردون يا فندي بالذمة
إيه بس عيب المصرية
الدنيا ضاقت بيك لما
ماتاخدش غير الأفرنجية
إفهم
و إعقل
يا أهبااال
يا أهبل ليه غيرنا يفارقنا
ماتخلي زيتنا في دقيقنا
دي المصرية تبيض وشك
الأفرنجية عينها في قرشك
يا سيدي إنت
اللي ماتكتبش و تقرا
الدجالين قالعين عنها
وتو ما تقع البقرة
مالحق ما تكتر سكاكينها
إخه إخيه ..إخييييه
تفوا عالجهل ميت تفة
يالا نكسر وراه شقفة
من تعليمنا أهلنا خايفة
واقعين ليه من قعر القفة
يا سيدي إنت
خليها دي حلقة في ودنك
من قبل ما تقري الافتحة
أول كلام تقوليه لابنك
وطنك مافيش زيه دحه
م النيل إمبوه
حبووووه
حبه يا نونو بالأكتر
من بابا و ماما والسكر
منه الـتسة و منه المما
إوعك تنسى فرض الأمة
يا جدع إنت
موضوع: كلمات اغانى سيد درويش 
الأحد 20 أبريل - 20:49:56
