والدة الشهيد مصطفى الصاوى: «النهاردة بس حسيت إن ابنى مات

لماذا هللت «الله أكبر» بالحكم على «مبارك» بالمؤبد؟

- «لأنه لن يعيش طويلاً، وكفاية علىَّ إنه يقضى باقى عمره مذلولاً فى السجن، والإعدام كان هيريحه وأنا مش عايزاه يرتاح أبداً».

ولماذا تبدلت ردود فعلك بسماع الأحكام؟

- لأن «العادلى» لازم يتعدم، هو الوحيد اللى مش هقدر أستنى عليه إنه يتسجن، شايفة دم ابنى على إيده، وكمان براءة جمال وعلاء خلّتنى أحس إن مصطفى مات فعلاً وحقه راح، لأنى كنت أتمنى إن مبارك يشوف ولاده مذلولين أو مقتولين أمامه، مش يخرجوا براءة ويدمروا البلد».

لماذا تقولين إنهما سيدمران البلد.. ماذا تتوقعى منهما؟

- أتوقع أن يتفقا مع أحمد شفيق ويرجع النظام السابق، ومش بعيد نستنى نشوف جمال رئيس بعد 4 سنين.

هل تكتفين بالحكم على «مبارك» و«العادلى» كمتهمين رئيسيين فى قتل المتظاهرين؟

- بالطبع لا، هناك ناس حتى الآن لم تأخذ جزاءها، ولا دخلت السجن مثل من كانوا فى الخدمة يوم 28 يناير، ودهسوا أولادنا بعربياتهم وضربوهم بالخرطوش، مش كفاية يحاكموا اللى أمر وبس، من نفذ يجب أن يأخد جزاءه، ومن السهل طبعاً أن سجلات الداخلية تعرف من كان فى الخدمة وقت الثورة، كلنا سمعنا عن الخطة 100 التى نفذت على ولادنا.

وما رد فعل ابنك الأصغر «مروان»؟

- هو صحيح عنده 12 سنة لكن فاهم كل حاجة، ودايماً يقول همّا دول اللى قتلوا أخويا.

ما شعورك بعد سماع الحكم؟

- عايزة أزور قبر «مصطفى» زى كل جمعة، وأقول له لسه مخدتش حقك يا ابنى، دمك لسه فى إيديهم، والنهاردة بس أنا حسيت إنك مت، ودمك راح هدر.