درس في رخامة المواصلات

من واقع خبريتي في مجال المواصلات والبهدله الي بشوفها لقيت لازم الواحد بسسلي طريقة شوية فا قلت اعمل كورسات في رخامة المواصلات

تن تن تاااااااااااااااااااان تشششششششششش

ازاى تبقى رخم في المواصلات وتتعلم الرخامة بأصولها

فيه ناس بتقول على الرخامة رزالة

عادى برضو

المهم انك تستحمل النقد دا

عشان الناس تحبك

واحدة واحدة معايا بقى إن شاء الله هخليك

أرخم واحد فى الدنيا دى

نبتدى الحصة

ازاى تبقى رذل فى المواصلات

لو راكب فى باص أو ميكروباص وجنبك حد نايم

اوعى تسيبه نايم >> ازعل منك والله

كل شوية اقعد قول وصلنا عشان يصحى مخضوض

و لو عمل اهبل صحيه وقوله مش انت نازل هنا بيتهيألى

لو مش نايم متسيبوش فى حاله برضه >> عيب عليك متجيش

ركز على سؤال واقعد اسألهوله كل شوية زى أنت نازل فين طب انت دفعت ولا لأ

لو قاعد هو جنب الشباك جوه وقالك عدينى قوله رجلى منملة مش قادر وخليه ينط زى القرد

أو قوله ماتنزل من الشباك

لو انت فى أتوبيس وقاعد على كرسى وجنبك ناس واقفة استمتع بقى وخدك وقتك

اتمطع بقى وقول ياسلام على الراحة الواحد مكنش عارف هيعمل أيه لو مش قاعد

طب ولو العكس بقى

اقعد اسأل كل واحد انت نازل فين

واقعد قول بصوت عالى ياجماعة محدش نازل قريب أصل انا عايز اقعد

طول مانت واقف قول كده لحد مايقعدوك

لما الكمسرى يجى ياخد منك الاجرة اسأله على تمن كذا مكان

يعنى قوله هو لغاية الحتة الفلانية بكام طب لغاية الحتة دى بكام

اسأل على تمن كل الاماكن اللى تعرفها لحد مايقولك ياعم خلصنى رايح فين

قوله مانا عشان ابقى عارف بس وتقل فى العيار يمكن يسيبك ويمشى

طب ولما لما يدى حد تذكرة

قوله ورينى كده لو سمحت واقعد اتأمل فيها

لحد ما صاحبها يزهق ويشدها منك

فى مفتش بقى ساعات بيطلع يفتش على التذاكر وبيطلع على السريع كده وينزل

أنت بقى اوعى تديهاله علطول كده >>> أزعل منك والله

دور عليها ساعة حط ايدك فى جيوبك مية مرة هيقولك خلص يا استاذ قوله ثوانى كانت معايا والله

واقلع الجذمة ودور فيها وفى الاخر طلعها من بوقك بعد مايكون هو مات من الملل

وقوله مش قولتلك انها كانت معايا

كفاية كده بقى حرام المفروض تنزل قبل الناس ماتموت منك

أستنى رايح فين أنت نازل عادى كده ولا كأنك رذل ولا حاجة

وأنت نازل هيبقى فى ناس واقفة أعمل نفسك مش عارف تعدى

وحاول تجاهد على قد ماتقدر وتضيع الوقت اللى تقدر عليه

لحد الناس ماتشيلك وترميك بعد ماتكون جبتلهم السكر ورفعت ضغطتهم

كده إنتهت الحصة الأولى

واللى عنده أى إضافة مفيش مانع

أهو معلومة ونستفيد منها كلنا

درس خصوصى مجانى أهو للى عايز يتعلم

زائر

مش بقولك دمك بقى تقيل اوى
الظاهر دة تاثير الشغل
هههههههههههههههه

» ازاى تبقى رذل فى المواصلات ؟