علي سلامة

زائر

تقريباً..

ولسه هاتشوف وتتفرج..
يا ابن آدم..
طول ما انت عايش..
مش عارف عندي إحساس..
إن مصر حد شّمْمها حاجة ف المولد..
وسرق منها الغوايش..
واداها صرة مربوطة..
لما فاقت وفتحتها..
لاقتنا..
بجد بجد..
يا حلاوتنا..
نُصنا بيدّور
علي علاج للحموضة..
والنُص التاني..
شوية حاجات..
مش موجودة..
عموما أنا عملت محضر ف القسم..
تاخد رقمه

زائر

[size=21]مفيش كوكو

آخر كلام يا عم..
طعام..
يعني مم..
يعني علي سبيل المثال..
سندويتشات..
وأرجوكو..
ماحدش يجيب سيرة الكوكو..
قدام العيال..
وكوكو للي مش عارف..
يعني دجاج..
يعني شوربة..
يعني ظفر..
معقول ده محتاج..
عقد عمل..
وغربة..
وسفر..
عارف..
لسه شوارعنا بتخاف من المطر..
ومطر للي مش عارف..
يعني خير..
إزاي ف بلدنا الخير..
أصبح خطر
[/size]..

زائر

بَوّابةْ تَفتِيشْ...
بَوّابْة تَفتيش عَلَى بَابَكْ....
كُل ما احَاولْ أعَدَّى تَزَمَّرْ...
وبْتْشَرَّطْ...
وَبتْتْأمَّرْ...
أرَجَع أدَوَّرْ تَانى وأدُوَر...
وكُل ما عَدَّي بَرْضُهْ تزمَّرْ...
طَب آدى السَّاعَةْ...
وآدى حَزَامي...
وآدى بطاقتي...
والنَضَّارَةْ...
وآدى عنواني...
وكُل حَكَايَتي...
وآدى أَمَارهْ...
حَتَّى الفكَهَّ البَاقْيةْ ف جيبي...
والأشعار...
والَمْحفَظةْ مَفيْهَاشْ غِيرْ صُوْرتَكْ...
ليلْ ونْهَارْ...
كُلْ هَدُوْمي...
زَى مَّا نَازَلْ منْ بَطْن أمي...
من غيرْ حَتَّى وَرَقةْ تُوَتْ...
وكُل مَافُوتْ...
الَبوابَّةْ بَرَضَكْ بِتزَمَرْ...
ولما لَمَحنْى...
واحد طَيبْ م الُحراَس...
وقَاللي اسْمَعني يا ابْن اَلَناسْ...
إرْمي الحتَّة الحلوةْ ف قَلَبكْ...
وعَدى...
والبَوابَة عُمْرهَا...
مَا تْزمَّرْ...

زائر

هل تسمعنى

ألو ألو..
هل تسمعني؟!
بكلم حضرتك من قدام..
فرن الحاج أبوصلاح..
كله سعادتك تمام..
والشعب مستمر ف الكفاح..
لا يا فندم مفيش قلق..
شوية كسور وكدمات..
واللي مات مات..
واللي راح راح..
الحمد لله زي الفل..
ويا رب ديماً..
من نجاح لنجاح..
معايا يا فندم..
ورحمة أمي مبسوط ومرتاح..
كله من خير سعادتك..
إحنا بس محتاجين خميرة بيرة..
لأ يا فندم.. بيرة إيه
أستغفر الله..
هو أنا بتاع كده..
أكلم حضرتك بعدين بقي..
عشان تقريباً الكارت خلص..
...
ألو ألو..
هل تسمعني..
بكلم معاليك..
من محطة أبوغريب..
هو يا فندم القطر..
اللي لا بيودي ولا بيجيب..
العتمة الكتمة..
الزحمة الكئيب..
الشعب ؟
ماله الشعب..
فرحان وإحساسه عالي..
وكل الحالات بتستجيب..
معانا يا فندم ؟
أجزخانة لكل مواطن وطبيب..
مرهم للحروق..
ورحمة أمي بعت أجيب..
طب يا فندم عشان القطر اتحرك..
الموت علينا حق يا فندم..
واللقا نصيب..
.....

ألو ألو
هل تسمعنى
بكلم جنابك
من عزبة شحاتة العريان دى حتة كده يافندم
بعيدة عن العين
لكن قريبة من حلوان
مفيش مية يافندم...
لكن مفيش حد عطشان
نور؟
ملزش لزوم النزر يافندم
كفاية الإحساس بالأمان
أنا ؟
ورحمة أمى زى الفل
مناخيرى ؟
لأ .. ده دور برد من زمان
الشعب ؟
مبسوط وبيغنى وفرحان
ماهى مصر حضرتك
امبارح كسبت السودان
طب يافندم
عشان تقريبا البيت بيقع
لا إله إلا الله

زائر

سنابل قمح..

مع مرور الوقت بقت بطاطا..

بقت آيس كريم شيكولاتة..

بقت طراطير..

بقت طوابير..

وبقت حاجات كتير..

بتضيع كده بمنتهي البساطة..

حرامي تقليدي..

يسرق جوزين فراخ..

ساعة ف إيدي..

يخطف سلسلة..

ينشل محفظة..

مع مرور الوقت بقي عصابة..

بقي مؤسسة..

بقي صاحب فلسفة..

بقي الأستاذ والكتاب والمدرسة..

شوية رجولة..

مع مرور الوقت بقت كفولة..

بقت بمبرز..

بقت كبسولة..

بقت حبة زرقة..

بقت مش فارقة..

بقت نوع..

حديد طري طوع..

بقت صورة..

وغيرة م اللبان دكر..

بقت ضهر البلد اللي انكسر..

بقت كده وكده..

بس ربك ستر..

وطن جميل براح..

كان بيسقي النيل..

كل يوم أفراح..

مع مرور الوقت..

بقي مرطع..

بقي مطمع..

بقي آخر انفتاح..

بقي سداح مداح..

وبقي نكتة بايخة..

من قلب مليان جراح..

زائر

سين سؤال

الله يخليك ..
خليك دقيقة معايا
هو أنا لما انضرب على قفايا
دى تعتبر إهانة؟
ولما أقول اللى جوايا..
تبقى دى خيانة
ولما كرامتى تنجرح ..
تتصلح فين وازاى
عند الميكانيكى ..
ولا النجار ..
ولا بكوباية شاى
وأسبرين من أبو ورقة خضرة
م الأجزخانة
طب هو أنا اسمى ..
فى أنهى كشف ..
وأنهى خانة
لما سألت نائب دايرتنا
قال انه مرفوع عنه الحصانة
وخالى شغل
وقاللى انسى ..
وبكرة تبقى زى الفل
وقلت له شكرا
والراجل كتر خيره
قاللى مع السلامة

زائر

زمارة الخطر

فاكر..

زمارة الخطر..

وطفي النور..

وأكياس الرمل..

وقدام كل بيت ساتر..

فاكر..

أيام السهر..

والامتحانات..

وكوباية شاي من إيد أمك..

وانت بتذاكر..

كنت بتفرح لما تنجح..

أو حد يقول عليك شاطر..

فاكر الأمان..

ننام وفاتحين البيبان..

دلوقتي ف كل شارع لجنة..

وف كل بيت عساكر..

فاكر..

معقول عشان تعيش..

لازم تطاطي وتقضيها..

طيب وحاضر..

مين اللي قال..

البحر غادر..

ومين اللي قال..

إنك خلاص تعبان..

ومش قادر..

ومين اللي سماك..

شحات وعريان وصابر..

هو احنا توهنا من بعض..

هو إحنا ليه..

ماشين وبصين ف الأرض..

هو احنا لسه بنحلم..

وبنحاول وبنعافر..

سؤال لا كان ع البال ولا ع الخاطر..

أسأل عليك..

يقولوا نايم..

وتسأل علي..

يقولولك سافر..

واخد بالك..

دلوقتي ف كل ثانية..

بنسمع الزمارة..

وبدال الغارة ألف غارة..

لكن لا بيصحي شارع..

ولا حارة..

وكل واحد فينا محتاج..

مليون أمارة..

عشان يحس بالخطر..

ياه..

يا ساتر..

الله
حلو قوي يامني
ربنا يخليكي ليا عشان عارفة انك كاتباهم مخصوص عشاني
عشان عارفة اني بحبهم
يخليكي ليا ياقمر

» البطل حسنى سلامة